Poem by: Abubakarr Kamara - (Dephoenix)
Insay di poda-poda
Grɔmbul nɔ de dɔn,
Ɔlman gɛt tɔk fɔ tɔk
Sɔman go tɔk
Bɔt in neba we nɔ
Put pɔt na faya
Te di wik de dɔn so.
Oda wan go se i taya
Wit aw ɔltin dɔn tinap
Lɛk bɔypikin na uman grɔn.
Wetin swit pas ɔl na we
Aprɛntis dɛn fil se
Dɛn mas-mas na pasenja ed
Dɛn fɔ gɛt am...hmm
Dɛn yon kes siryɔs!
Insay di poda-poda
Gladi-gladi nɔ de na pɔsin fes
Fes dɛm tɛns lɛk na met is,
Jok sɛf kin kam wit sɔnkɔ-sɔnkɔ.
Na de yu go si Sori
De lelemu bɔt Sule,
Sale go lɔk in yon na bɔx
Ɛn de jɛpɛ pan Abi in yon.
Insay di poda-poda
Plaba nɔ de dɔn,
Ɔltɛm dɛn gɛt nyu wan.
Som tɛm fɔ chenj nɔmɔ
Go mek da man chɛr mami kɔs
Lɛk se nɔto mama bɔn am.
Smɔl tɔk go mek
Da mared uman tɛl
Da yɔnbɔy aw i want
Mek man andul am na bed
Lɛk udat de fɛn lɔya fɔ os kes
Ɔltin kin jus ful mi mɔt!
Insay di poda-poda
Na de bɔku kin blo maynd
Bɔt di kɔntri in tranganɛs.
Da ivin tɛm yon kin swit....
Na di tɛm dɛn kin koto
Fɔ di big wet fɔl dɛm we
De mek di kɔntri de fɔdɔm
Udat in drɛgin nɔ mek sɛns
Frɔm mɔnin to nɛt i kin jus wet
Mek pɔsin krach in krɔ-krɔ
So i de pul di wam-at klos pan di pɔsin.
Insay di poda-poda
Na de yu go yɛri ɔltin bɔt yu kɔntri
No wɔnda r si da mɛmba ɔf parlimɛnt
In yai rɛd way wi dɔn kip kɔmpin
Pa dɛm Insay d poda-poda.
©️A.B. Kamara (Sierra Phoenix)
The dictions are nicely put in each lines and stanzas.
ReplyDelete